ਅਮਰੀਕਾ ਦੇ ਜੰਗਲਾਂ ‘ਚ ਲੱਗੀ ਭਿਆਨਕ ਅੱਗ ਰਿਹਾਇਸ਼ੀ ਖੇਤਰਾਂ ਵਿੱਚ ਫੈਲੀ, 30 ਹਜ਼ਾਰ ਤੋਂ ਵੱਧ ਲੋਕ ਘਰੋਂ ਬੇਘਰ
ਵਾਸਿੰਗਟਨ, 9 ਜਨਵਰੀ, ਦੇਸ਼ ਕਲਿਕ ਬਿਊਰੋ :
ਅਮਰੀਕਾ ਦੇ ਕੈਲੀਫੋਰਨੀਆ ਸੂਬੇ ‘ਚ ਲਾਸ ਏਂਜਲਸ ਨੇੜੇ ਤਿੰਨ ਜੰਗਲਾਂ ‘ਚ ਮੰਗਲਵਾਰ ਨੂੰ ਭਿਆਨਕ ਅੱਗ ਲੱਗ ਗਈ। ਸੀਐਨਐਨ ਦੇ ਅਨੁਸਾਰ, ਅੱਗ ਪਹਿਲਾਂ ਪੈਸੀਫਿਕ ਪੈਲੀਸਾਡਸ, ਈਟਨ ਅਤੇ ਹਰਸਟ ਦੇ ਜੰਗਲਾਂ ਵਿੱਚ ਲੱਗੀ ਅਤੇ ਫਿਰ ਹੁਣ ਰਿਹਾਇਸ਼ੀ ਖੇਤਰਾਂ ਵਿੱਚ ਵੀ ਫੈਲ ਰਹੀ ਹੈ। ਅੱਗ ਪੈਸੀਫਿਕ ਪੈਲੀਸੇਡਸ ਵਿੱਚ ਸਵੇਰੇ 10 ਵਜੇ, ਈਟਨ ਵਿੱਚ ਸ਼ਾਮ 6 ਵਜੇ ਅਤੇ ਹਰਸਟ ਵਿੱਚ ਰਾਤ 10 ਵਜੇ ਲੱਗੀ।
ਪੈਸੀਫਿਕ ਪਾਲਿਸੇਡਜ਼ ਨੂੰ ਸਭ ਤੋਂ ਵੱਧ ਨੁਕਸਾਨ ਹੋਇਆ ਹੈ। ਇੱਥੇ ਲੱਗੀ ਅੱਗ ਡੇਢ ਦਿਨ ਵਿੱਚ 3000 ਏਕੜ ਤੱਕ ਫੈਲ ਗਈ ਹੈ। ਅੱਗ ਕਾਰਨ 30 ਹਜ਼ਾਰ ਤੋਂ ਵੱਧ ਲੋਕਾਂ ਨੂੰ ਆਪਣੇ ਘਰ ਛੱਡਣੇ ਪਏ। ਰਿਪੋਰਟ ਮੁਤਾਬਕ, ਪੈਸੀਫਿਕ ਪੈਲੀਸੇਡਸ ‘ਚ ਇਹ ਅੱਗ ਇਕ ਮਿੰਟ ‘ਚ ਪੰਜ ਫੁੱਟਬਾਲ ਮੈਦਾਨ ਦੇ ਬਰਾਬਰ ਖੇਤਰ ਨੂੰ ਸਾੜ ਕੇ ਸੁਆਹ ਕਰ ਰਹੀ ਹੈ।
ਲਾਸ ਏਂਜਲਸ ਪ੍ਰਸ਼ਾਸਨ ਨੇ ਪੂਰੇ ਸ਼ਹਿਰ ਵਿੱਚ ਐਮਰਜੈਂਸੀ ਦਾ ਐਲਾਨ ਕਰ ਦਿੱਤਾ ਹੈ। ਇਹ ਅਮਰੀਕਾ ਦੀ ਸਭ ਤੋਂ ਵੱਧ ਆਬਾਦੀ ਵਾਲੀ ਕਾਉਂਟੀ ਹੈ। ਇੱਥੇ 1 ਕਰੋੜ ਲੋਕ ਰਹਿੰਦੇ ਹਨ। ਜੰਗਲ ‘ਚ ਅੱਗ ਫੈਲਣ ਕਾਰਨ ਇੱਥੋਂ ਦੇ ਕਰੀਬ 50 ਹਜ਼ਾਰ ਲੋਕਾਂ ਨੂੰ ਤੁਰੰਤ ਆਪਣੇ ਘਰ ਖਾਲੀ ਕਰਨ ਲਈ ਕਿਹਾ ਗਿਆ ਹੈ।
