ਕੈਨੇਡਾ ‘ਚ ਸਟੋਰਾਂ ’ਚੋਂ ਵੱਡੇ ਪੱਧਰ ’ਤੇ ਮੱਖਣ-ਘਿਓ ਚੋਰੀ ਕਰਨ ਵਾਲੇ 6 ਪੰਜਾਬੀ ਗ੍ਰਿਫ਼ਤਾਰ
ਓਟਾਵਾ, 31 ਜਨਵਰੀ, ਦੇਸ਼ ਕਲਿਕ ਬਿਊਰੋ :
ਪੁਲਿਸ ਨੇ ਪੀਲ ਰੀਜਨ ’ਚ ਵਧ ਰਹੀਆਂ ਮੱਖਣ ਤੇ ਘਿਉ ਦੀਆਂ ਚੋਰੀ ਦੀਆਂ ਵਾਰਦਾਤਾਂ ਨੂੰ ਲੈ ਕੇ ਵੱਡਾ ਖੁਲਾਸਾ ਕਰਦਿਆਂ 6 ਪੰਜਾਬੀਆਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ।
ਅਧਿਕਾਰੀਆਂ ਮੁਤਾਬਕ, “ਪ੍ਰੋਜੈਕਟ ਫਲੈਹਰਟੀ” ਦੇ ਤਹਿਤ ਇਹ ਜਾਂਚ ਸ਼ੁਰੂ ਕੀਤੀ ਗਈ ਸੀ, ਜਿਸ ਦੌਰਾਨ ਪਤਾ ਲੱਗਾ ਕਿ ਕੁਝ ਗੈਂਗ ਕਰਿਆਨੇ ਦੀਆਂ ਦੁਕਾਨਾਂ (ਸਟੋਰਾਂ) ’ਚੋਂ ਵੱਡੇ ਪੱਧਰ ’ਤੇ ਮੱਖਣ ਤੇ ਘਿਓ ਚੋਰੀ ਕਰ ਰਹੇ ਸਨ। ਪੁਲਿਸ ਨੇ ਦੱਸਿਆ ਕਿ 2023 ਨਾਲੋਂ ਇਸ ਸਾਲ ਮੱਖਣ ਚੋਰੀ ਦੀਆਂ ਵਾਰਦਾਤਾਂ ’ਚ 135% ਵਾਧਾ ਹੋਇਆ ਹੈ, ਅਤੇ ਹੁਣ ਤੱਕ 180 ਤੋਂ ਵੱਧ ਮਾਮਲੇ ਦਰਜ ਕੀਤੇ ਜਾ ਚੁੱਕੇ ਹਨ।
ਅਧਿਕਾਰੀਆਂ ਨੇ ਦੱਸਿਆ ਕਿ ਤਿੰਨ ਲੋਕਾਂ ਉਤੇ ਅਪਰਾਧ ਰਾਹੀਂ ਪ੍ਰਾਪਤ ਕੀਤੀ ਜਾਇਦਾਦ ਰੱਖਣ ਦੇ ਦੋਸ਼ ਹਨ, ਜਦਕਿ ਬਾਕੀ ਤਿੰਨ ’ਤੇ 5,000 ਡਾਲਰ ਚੋਰੀ ਦਾ ਦੋਸ਼ ਲਗਾਇਆ ਗਿਆ ਹੈ।
ਹੁਣ ਪੁਲਿਸ ਇਹ ਵੀ ਜਾਂਚ ਕਰ ਰਹੀ ਹੈ ਕਿ ਕੀ ਇਹ ਚੋਰੀਆ ਸੰਗਠਿਤ ਢੰਗ ਨਾਲ ਹੋ ਰਹੀਆਂ ਸਨ ਅਤੇ ਕੀ ਕੋਈ ਵਪਾਰੀ ਚੋਰੀ ਹੋਏ ਉਤਪਾਦ ਖਰੀਦ ਰਿਹਾ ਸੀ।
ਗੁਏਲਫ਼ ਅਤੇ ਬ੍ਰੈਂਟਫੋਰਡ ’ਚ ਵੀ ਇਸ ਤਰ੍ਹਾਂ ਦੀਆਂ ਘਟਨਾਵਾਂ ਸਾਹਮਣੇ ਆਈਆਂ ਹਨ, ਜਿੱਥੇ ਪੁਲਿਸ ਪਿਛਲੇ ਸਾਲ ਤੋਂ ਮੱਖਣ ਚੋਰੀ ਦੀ ਜਾਂਚ ਕਰ ਰਹੀ ਹੈ।
Published on: ਜਨਵਰੀ 31, 2025 1:55 ਬਾਃ ਦੁਃ
