ਸਿਰਸਾ, 8 ਫਰਵਰੀ, ਦੇਸ਼ ਕਲਿਕ ਬਿਊਰੋ :
ਹਰਿਆਣਾ ਦੇ ਸਿਰਸਾ ਸਥਿਤ ਡੇਰਾ ਸੱਚਾ ਸੌਦਾ ਦਾ ਮੁਖੀ ਰਾਮ ਰਹੀਮ ਰੋਹਤਕ ਦੀ ਸੁਨਾਰੀਆ ਜੇਲ੍ਹ ਤੋਂ 30 ਦਿਨਾਂ ਦੀ ਮਿਲੀ ਪੈਰੋਲ ਵਿੱਚੋਂ 12 ਦਿਨ ਸਿਰਸਾ ਡੇਰੇ ਵਿੱਚ ਬਿਤਾਉਣ ਤੋਂ ਬਾਅਦ ਅੱਜ ਸ਼ਨੀਵਾਰ ਦੁਪਹਿਰ 2:30 ਵਜੇ ਉੱਤਰ ਪ੍ਰਦੇਸ਼ ਦੇ ਬਰਨਾਵਾ ਆਸ਼ਰਮ ਲਈ ਰਵਾਨਾ ਹੋ ਗਿਆ। ਉਹ 8 ਗੱਡੀਆਂ ਦੇ ਕਾਫਲੇ ਦੇ ਨਾਲ ਰਵਾਨਾ ਹੋਇਆ।ਡੇਰਾ ਮੁਖੀ ਦੇ ਕਾਫਲੇ ਨੂੰ ਡੇਰੇ ਦੇ ਪਿੱਛੇ ਵਾਲੇ ਪਾਸੇ ਪਿੰਡ ਨੇਜੀਆਖੇੜਾ ਤੋਂ ਬਾਜੇਕਾਂ ਰੋਡ ’ਤੇ ਬਣੇ ਨਾਕੇ ਰਾਹੀਂ ਕੱਢਿਆ ਗਿਆ।
ਜਿਕਰਯੋਗ ਹੈ ਕਿ ਸਾਧਵੀਆਂ ਦੇ ਯੌਨ ਸ਼ੋਸ਼ਣ ਮਾਮਲੇ ਵਿੱਚ ਉਮਰ ਕੈਦ ਦੀ ਸਜ਼ਾ ਕੱਟ ਰਿਹਾ ਡੇਰਾ ਮੁਖੀ ਰਾਮ ਰਹੀਮ 28 ਜਨਵਰੀ ਨੂੰ 30 ਦਿਨਾਂ ਦੀ ਪੈਰੋਲ ’ਤੇ ਆਇਆ ਸੀ। ਇਸ ਵਾਰ ਉਸ ਨੂੰ 12ਵੀਂ ਵਾਰ ਪੈਰੋਲ ਮਿਲੀ ਹੈ। 25 ਅਗਸਤ 2017 ਨੂੰ ਗ੍ਰਿਫਤਾਰ ਕੀਤੇ ਗਏ ਰਾਮ ਰਹੀਮ ਨੂੰ ਸਾਢੇ ਸੱਤ ਸਾਲ ਦੇ ਦੌਰਾਨ ਪਹਿਲੀ ਵਾਰ ਕੁਝ ਦਿਨਾਂ ਲਈ ਸਿਰਸਾ ਡੇਰੇ ਵਿੱਚ ਪੈਰੋਲ ਕੱਟਣ ਦੀ ਇਜਾਜ਼ਤ ਦਿੱਤੀ ਗਈ ਸੀ।28 ਜਨਵਰੀ ਦੀ ਸਵੇਰ ਲਗਭਗ 8:30 ਵਜੇ ਡੇਰਾ ਮੁਖੀ ਸਿਰਸਾ ਡੇਰੇ ਵਿੱਚ ਪਹੁੰਚਿਆ ਸੀ।
Published on: ਫਰਵਰੀ 8, 2025 5:28 ਬਾਃ ਦੁਃ
