ਢਾਕਾ, 6 ਫ਼ਰਵਰੀ, ਦੇਸ਼ ਕਲਿਕ ਬਿਊਰੋ :
ਬੰਗਲਾਦੇਸ਼ ਦੇ ਕਈ ਸ਼ਹਿਰਾਂ ਵਿੱਚ ਅਵਾਮੀ ਲੀਗ ਦੇ ਪ੍ਰਸਤਾਵਿਤ ਦੇਸ਼ ਵਿਆਪੀ ਵਿਰੋਧ ਪ੍ਰਦਰਸ਼ਨ ਤੋਂ ਪਹਿਲਾਂ ਬੁੱਧਵਾਰ ਦੇਰ ਰਾਤ ਫਿਰ ਤੋਂ ਹਿੰਸਾ ਭੜਕ ਗਈ। ਪ੍ਰਦਰਸ਼ਨਕਾਰੀਆਂ ਨੇ ਸਾਬਕਾ ਪ੍ਰਧਾਨ ਮੰਤਰੀ ਸ਼ੇਖ ਹਸੀਨਾ ਦੇ ਪਿਤਾ ਤੇ ਬੰਗਲਾਦੇਸ਼ ਦੇ ਸੰਸਥਾਪਕ ਸ਼ੇਖ ਮੁਜੀਬੁਰ ਰਹਿਮਾਨ ‘ਬੰਗਬੰਧੂ’ ਦੇ ਧਨਮੰਡੀ-32 ਸਥਿਤ ਨਿਵਾਸ ‘ਤੇ ਧਾਵਾ ਬੋਲਿਆ ਅਤੇ ਭੰਨਤੋੜ ਕੀਤੀ।
ਦੂਜੇ ਪਾਸੇ ਖੁਲਨਾ ਵਿੱਚ ਸ਼ੇਖ ਹਸੀਨਾ ਦੇ ਚਚੇਰੇ ਭਰਾ ਸ਼ੇਖ ਸੋਹੇਲ ਅਤੇ ਸ਼ੇਖ ਜਵੇਲ ਦੇ ਘਰ ਦੋ ਬੁਲਡੋਜ਼ਰਾਂ ਨਾਲ ਢਾਹ ਦਿੱਤੇ ਗਏ ਹਨ। ਇਹ ਹਿੰਸਾ ਸੋਸ਼ਲ ਮੀਡੀਆ ‘ਤੇ ‘ਬੁਲਡੋਜ਼ਰ ਜਲੂਸ’ ਦੇ ਐਲਾਨ ਤੋਂ ਬਾਅਦ ਹੋਈ ਸੀ। ਜਦੋਂ ਹਮਲਾ ਹੋਇਆ ਤਾਂ ਉੱਥੇ ਸੁਰੱਖਿਆ ਬਲ ਵੀ ਮੌਜੂਦ ਸਨ।ਉਨ੍ਹਾਂ ਭੀੜ ਨੂੰ ਉਥੋਂ ਜਾਣ ਲਈ ਮਨਾਉਣ ਦੀ ਕੋਸ਼ਿਸ਼ ਕੀਤੀ, ਪਰ ਸਾਰੀਆਂ ਕੋਸ਼ਿਸ਼ਾਂ ਅਸਫਲ ਰਹੀਆਂ।
ਕੁਝ ਸ਼ਰਾਰਤੀ ਅਨਸਰ ਰਿਹਾਇਸ਼ ਅਤੇ ਅਜਾਇਬ ਘਰ ਵਿੱਚ ਵੀ ਦਾਖਲ ਹੋ ਗਏ। ਬਾਲਕੋਨੀ ‘ਤੇ ਚੜ੍ਹ ਕੇ ਭੰਨਤੋੜ ਕੀਤੀ। ਦੱਸਿਆ ਜਾ ਰਿਹਾ ਹੈ ਕਿ ਘਰ ‘ਚ ਅੱਗਜ਼ਨੀ ਵੀ ਕੀਤੀ ਗਈ ਹੈ। ਇਸ ਦੀਆਂ ਕਈ ਵੀਡੀਓਜ਼ ਅਤੇ ਤਸਵੀਰਾਂ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਰਹੀਆਂ ਹਨ।
Published on: ਫਰਵਰੀ 6, 2025 7:05 ਪੂਃ ਦੁਃ
