ਚੰਡੀਗੜ੍ਹ, 9 ਮਾਰਚ, ਦੇਸ਼ ਕਲਿਕ ਬਿਊਰੋ :
ਪੰਜਾਬ ਵਿੱਚ ਤੇਜ਼ ਧੁੱਪ ਨਿਕਲਣ ਤੋਂ ਬਾਅਦ ਤਾਪਮਾਨ ਵਿੱਚ ਵਾਧਾ ਜਾਰੀ ਹੈ। ਘੱਟੋ-ਘੱਟ ਅਤੇ ਵੱਧੋ-ਵੱਧ ਤਾਪਮਾਨ ਵਿੱਚ 15 ਡਿਗਰੀ ਤੋਂ ਵੱਧ ਦਾ ਅੰਤਰ ਵੇਖਣ ਨੂੰ ਮਿਲ ਰਿਹਾ ਹੈ। ਮੌਸਮ ਵਿਭਾਗ ਅਨੁਸਾਰ, ਆਉਣ ਵਾਲੇ 48 ਘੰਟਿਆਂ ਵਿੱਚ ਰਾਜ ਦਾ ਤਾਪਮਾਨ 30 ਡਿਗਰੀ ਪਾਰ ਕਰਨ ਦੀ ਉਮੀਦ ਹੈ। ਪਰ, ਇਸ ਤੋਂ ਬਾਅਦ ਰਾਜ ਵਿੱਚ ਮੀਂਹ ਪੈਣ ਦੀ ਵੀ ਸੰਭਾਵਨਾ ਹੈ।ਜਿਸ ਦੇ ਅਨੁਸਾਰ, 12 ਮਾਰਚ ਤੋਂ ਬਾਅਦ ਰਾਜ ਦੇ ਕੁਝ ਹਿੱਸਿਆਂ ਵਿੱਚ ਮੀਂਹ ਹੋ ਸਕਦਾ ਹੈ। ਮੌਸਮ ਵਿਗਿਆਨ ਕੇਂਦਰ ਅਨੁਸਾਰ, ਔਸਤ ਵੱਧੋ-ਵੱਧ ਤਾਪਮਾਨ ਵਿੱਚ 1.2 ਡਿਗਰੀ ਸੈਲਸੀਅਸ ਦਾ ਵਾਧਾ ਹੋਇਆ ਹੈ। ਹਾਲਾਂਕਿ, ਇਹ ਰਾਜ ਵਿੱਚ ਆਮ ਤਾਪਮਾਨ ਨਾਲੋਂ 2 ਡਿਗਰੀ ਸੈਲਸੀਅਸ ਵੱਧ ਹੈ।ਰਾਜ ਵਿੱਚ ਸਭ ਤੋਂ ਵੱਧ ਤਾਪਮਾਨ 30.2 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ, ਜੋ ਕਿ ਅਬੋਹਰ ਵਿੱਚ ਰਿਹਾ। ਅੱਜ ਵੀ ਪੰਜਾਬ ਵਿੱਚ ਹਾਲਾਤ ਏਦਾਂ ਦੇ ਹੀ ਰਹਿਣਗੇ। ਅਨੁਮਾਨ ਲਗਾਇਆ ਜਾ ਰਿਹਾ ਹੈ ਕਿ ਤਾਪਮਾਨ ਵਧੇਗਾ ਅਤੇ ਆਮ ਤੋਂ ਉੱਤੇ ਰਹੇਗਾ।
ਪੰਜਾਬ ਦੇ 6 ਜ਼ਿਲ੍ਹੇ ਅਜਿਹੇ ਹਨ, ਜਿੱਥੇ ਤਾਪਮਾਨ 28°C ਤੋਂ ਪਾਰ ਹੋ ਰਿਹਾ ਹੈ। ਸ਼ਨੀਵਾਰ ਸ਼ਾਮ ਨੂੰ ਪਟਿਆਲਾ ਵਿੱਚ ਤਾਪਮਾਨ 28.6°C, ਬਠਿੰਡਾ ਵਿੱਚ 29°C, ਫਤਹਿਗੜ੍ਹ ਸਾਹਿਬ ਵਿੱਚ 28.2°C, ਅਬੋਹਰ ਵਿੱਚ 30.2°C, ਫਿਰੋਜ਼ਪੁਰ ਵਿੱਚ 29.2°C, ਰੂਪਨਗਰ ਵਿੱਚ 28.9°C ਅਤੇ ਮੋਹਾਲੀ ਵਿੱਚ 28°C ਦਰਜ ਕੀਤਾ ਗਿਆ।ਮੌਸਮ ਵਿਗਿਆਨ ਕੇਂਦਰ ਮੁਤਾਬਕ, ਅੱਜ ਤੋਂ ਪੰਜਾਬ ਵਿੱਚ ਪੱਛਮੀ ਗੜਬੜੀ ਸਰਗਰਮ ਹੋ ਰਹੀ ਹੈ। ਪਰ, ਇਸਦਾ ਪ੍ਰਭਾਵ ਸਿਰਫ਼ ਪਹਾੜੀ ਇਲਾਕਿਆਂ ਵਿੱਚ ਰਹੇਗਾ। ਉੱਥੇ ਅੱਜ ਤੋਂ ਮੀਂਹ ਅਤੇ ਬਰਫ਼ਬਾਰੀ ਦੀ ਸੰਭਾਵਨਾ ਬਣ ਰਹੀ ਹੈ।ਮੈਦਾਨੀ ਇਲਾਕਿਆਂ ਵਿੱਚ ਇਸਦਾ ਪ੍ਰਭਾਵ 12 ਮਾਰਚ ਤੋਂ ਵੇਖਣ ਨੂੰ ਮਿਲ ਸਕਦਾ ਹੈ। 12 ਤੋਂ 15 ਮਾਰਚ ਤਕ ਪੰਜਾਬ ਵਿੱਚ ਮੀਂਹ ਪੈਣ ਦੇ ਅਸਾਰ ਹਨ। ਉਥੇ ਹੀ, ਹਰਿਆਣਾ ਵਿੱਚ 14-15 ਮਾਰਚ ਨੂੰ ਮੀਂਹ ਪੈ ਸਕਦਾ ਹੈ।
Published on: ਮਾਰਚ 9, 2025 8:50 ਪੂਃ ਦੁਃ
