ਚੰਡੀਗੜ੍ਹ, 14 ਜੁਲਾਈ, ਦੇਸ਼ ਕਲਿਕ ਬਿਊਰੋ :
ਇਟਲੀ ਦੇ ਉੱਤਰੀ ਵੇਰੋਨਾ ਸੂਬੇ ਵਿੱਚ ਉਥੋਂ ਦੇ ਅਧਿਕਾਰੀਆਂ ਨੇ 33 ਭਾਰਤੀਆਂ ਨੂੰ ਬੰਧੂਆ ਮਜ਼ਦੂਰੀ ਤੋਂ ਮੁਕਤ ਕਰਵਾਇਆ ਹੈ। ਰਿਹਾਅ ਕੀਤੇ ਗਏ 33 ਭਾਰਤੀਆਂ ਵਿੱਚੋਂ ਜ਼ਿਆਦਾਤਰ ਪੰਜਾਬੀ ਮੂਲ ਦੇ ਹਨ। ਇੰਨਾ ਹੀ ਨਹੀਂ ਜਿਨ੍ਹਾਂ ਦੋ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ, ਉਹ ਵੀ ਪੰਜਾਬੀ ਮੂਲ ਦੇ ਹਨ। ਅਧਿਕਾਰੀਆਂ ਨੇ ਦੋਵਾਂ ਕਥਿਤ ਮੁਲਜਮਾਂ ਕੋਲੋਂ 5.45 ਲੱਖ ਯੂਰੋ ਵੀ ਜ਼ਬਤ ਕਰ ਲਏ ਹਨ। ਘਟਨਾ ਦੀ ਜਾਂਚ ਜੂਨ ਮਹੀਨੇ ਸ਼ੁਰੂ ਹੋਈ ਸੀ।ਇਟਲੀ ਵਿੱਚ ਬੰਧੂਆ ਮਜ਼ਦੂਰੀ ਜੂਨ ਵਿੱਚ ਇੱਕ ਹਾਦਸੇ ਤੋਂ ਬਾਅਦ ਚਰਚਾ ਵਿੱਚ ਆਈ ਸੀ।
ਜਿਨ੍ਹਾਂ ਵਿੱਚੋਂ ਫਲਾਂ ਨੂੰ ਤੋੜਨ ਵਾਲੇ ਪੰਜਾਬੀ ਸਤਨਾਮ ਸਿੰਘ ਦੀ ਮਸ਼ੀਨ ਨਾਲ ਹੱਥ ਕੱਟਣ ਨਾਲ ਮੌਤ ਹੋ ਗਈ ਸੀ। ਰੋਮ ਨੇੜੇ ਲਾਜ਼ੀਓ ਵਿੱਚ ਸਟ੍ਰਾਬੇਰੀ ਰੈਪਿੰਗ ਮਸ਼ੀਨ ਨਾਲ ਟਕਰਾਉਣ ਕਾਰਨ ਸਤਨਾਮ ਦਾ ਹੱਥ ਕੱਟ ਗਿਆ ਸੀ। ਜਿਸ ਤੋਂ ਬਾਅਦ ਉਸ ਨੂੰ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਉਸ ਦੀ ਮੌਤ ਹੋ ਗਈ ਸੀ।
ਰਾਇਟਰਜ਼ ਦੀ ਰਿਪੋਰਟ ਅਨੁਸਾਰ, ਪੁਲਿਸ ਨੇ ਕਿਹਾ ਕਿ ਕਥਿਤ ਗੈਂਗ-ਮਾਸਟਰ, ਜੋ ਕਿ ਭਾਰਤ ਤੋਂ ਹੀ ਸਨ, ਸੀਜਨਲ ਵਰਕ ਪਰਮਿਟ 'ਤੇ ਸਾਥੀ ਨਾਗਰਿਕਾਂ ਨੂੰ ਇਟਲੀ ਲਿਆਉਂਦੇ ਸਨ। ਹਰੇਕ ਬੰਧੂਆ ਮਜ਼ਦੂਰ ਨੂੰ 17,000 ਯੂਰੋ ਪ੍ਰਤੀ ਮਹੀਨਾ ਦੇਣ ਅਤੇ ਬਿਹਤਰ ਭਵਿੱਖ ਦੇ ਵਾਅਦੇ ਨਾਲ ਲਿਆਂਦਾ ਜਾਂਦਾ ਸੀ। ਪਰ ਇੱਥੇ ਪਹੁੰਚਦਿਆਂ ਹੀ ਹਾਲਾਤ ਬਦਲ ਜਾਂਦੇ ਸਨ।