ਸ਼ਿਮਲਾ, 13 ਅਗਸਤ, ਦੇਸ਼ ਕਲਿਕ ਬਿਊਰੋ :
ਹਿਮਾਚਲ ਦੇ ਸ਼ਿਮਲਾ 'ਚ ਨਿਰਮਾਣ ਅਧੀਨ ਸੁਰੰਗ ਅੱਜ ਮੰਗਲਵਾਰ ਸਵੇਰੇ ਢਹਿ ਗਈ। ਪਰਵਾਣੂ ਤੋਂ ਸ਼ਿਮਲਾ ਤੱਕ ਨਿਰਮਾਣ ਅਧੀਨ ਚਾਰ ਮਾਰਗ 'ਤੇ ਸੰਜੌਲੀ ਦੇ ਚਲੋਂਥੀ ਵਿਖੇ ਟਿਟੇਰੀ ਸੁਰੰਗ ਦੇ ਪੋਰਟਲ ਦਾ ਕੰਮ ਚੱਲ ਰਿਹਾ ਸੀ। ਸੋਮਵਾਰ ਸ਼ਾਮ ਨੂੰ ਇੱਥੇ ਕੁਝ ਪੱਥਰ ਅਤੇ ਮਿੱਟੀ ਡਿੱਗਣੀ ਸ਼ੁਰੂ ਹੋ ਗਈ ਸੀ। ਇਸ ਤੋਂ ਬਾਅਦ ਸੁਰੰਗ ਵਿੱਚ ਕੰਮ ਕਰ ਰਹੇ ਕਰਮਚਾਰੀਆਂ ਅਤੇ ਮਸ਼ੀਨਰੀ ਨੂੰ ਪਹਿਲਾਂ ਹੀ ਬਾਹਰ ਕੱਢ ਲਿਆ ਗਿਆ ਸੀ।NHAI ਦੇ ਪ੍ਰੋਜੈਕਟ ਮੈਨੇਜਰ ਅਚਲ ਜਿੰਦਲ ਨੇ ਦੱਸਿਆ ਕਿ ਜਿੱਥੇ ਸੁਰੰਗ ਪੋਰਟਲ ਬਣਾਇਆ ਜਾ ਰਿਹਾ ਸੀ, ਉੱਥੇ ਮਲਬਾ ਡੰਪ ਹੋ ਗਿਆ ਸੀ। ਪੋਰਟਲ ਲਈ ਰਾਹ ਪੱਧਰਾ ਕਰਨ ਦਾ ਕੰਮ ਚੱਲ ਰਿਹਾ ਸੀ। ਭਾਰੀ ਮੀਂਹ ਕਾਰਨ ਸੁਰੰਗ ਦੇ ਪੋਰਟਲ 'ਤੇ ਜ਼ਮੀਨ ਖਿਸਕ ਗਈ।
ਇਹ ਵੀ ਪੜ੍ਹੋ: ਮਾਤਾ ਨੈਣਾ ਦੇਵੀ ਤੋਂ ਪਰਤ ਰਹੇ ਸ਼ਰਧਾਲੂਆਂ ਨਾਲ ਫਤਹਿਗੜ੍ਹ ਸਾਹਿਬ ਵਿਖੇ ਵਾਪਰਿਆ ਹਾਦਸਾ, ਇੱਕ ਦੀ ਮੌਤ ਪੰਜ ਜ਼ਖਮੀ
ਇਸੇ ਦੌਰਾਨ ਕਿਨੌਰ ਦੇ ਨਿਗੁਲਸਰੀ ਨੇੜੇ ਨੈਸ਼ਨਲ ਹਾਈਵੇ-5 ਜ਼ਮੀਨ ਖਿਸਕਣ ਕਾਰਨ ਕਈ ਘੰਟਿਆਂ ਤੋਂ ਬੰਦ ਹੈ। ਅੱਜ ਸ਼ਾਮ ਤੱਕ ਇਸ ਦੇ ਬਹਾਲ ਹੋਣ ਦੀ ਉਮੀਦ ਹੈ। ਦੂਜੇ ਪਾਸੇ ਚੰਬਾ ਦੇ ਪ੍ਰੋਥਾ ਵਿੱਚ ਪਹਾੜੀ ਤੋਂ ਪੱਥਰ ਡਿੱਗਣ ਕਾਰਨ ਭੂਆ ਅਤੇ ਭਤੀਜੇ ਦੀ ਮੌਤ ਹੋ ਗਈ। ਮ੍ਰਿਤਕਾਂ ਦੀ ਪਛਾਣ ਅਰਪਨਾ (26) ਅਤੇ ਅਕਸ਼ੈ (9) ਵਾਸੀ ਓਥਲ ਵਜੋਂ ਹੋਈ ਹੈ। 3 ਸਾਲਾ ਤਰੁਣ ਨੂੰ ਵੀ ਸੱਟਾਂ ਲੱਗੀਆਂ। ਉਹ ਅਰਪਨਾ ਦੀ ਪਿੱਠ 'ਤੇ ਚੁੱਕਿਆ ਹੋਇਆ ਸੀ।
ਇਹ ਵੀ ਪੜ੍ਹੋ: ਮੌਸਮ ਵਿਭਾਗ ਵੱਲੋਂ ਦੇਸ਼ ਦੇ 20 ਰਾਜਾਂ ‘ਚ ਭਾਰੀ ਮੀਂਹ ਦਾ ਅਲਰਟ, ਰਾਜਸਥਾਨ 'ਚ 8 ਲੋਕਾਂ ਦੀ ਮੌਤ ਸਕੂਲਾਂ ‘ਚ ਛੁੱਟੀ