ਨਵੀਂ ਦਿੱਲੀ, 18 ਅਗਸਤ, ਦੇਸ਼ ਕਲਿੱਕ ਬਿਓਰੋ :
ਖਾਣ ਪੀਣ ਦੀਆਂ ਚੀਜ਼ਾਂ ਵਿੱਚ ਮਿਲਾਵਟ ਕਰਨ ਦੀਆਂ ਅਤੇ ਨਕਲੀ ਚੀਜਾਂ ਦੀਆਂ ਖ਼ਬਰਾਂ ਆਮ ਸੁਣਨ ਨੂੰ ਮਿਲਦੀਆਂ ਹਨ। ਪਰ ਹੁਣ ਲਸਣ ਵੀ ਨਕਲੀ ਆ ਗਿਆ ਹੈ। ਅਜਿਹਾ ਮਾਮਲਾ ਮਹਾਂਰਾਸ਼ਟਰ ਵਿੱਚ ਸਾਹਮਣੇ ਆਇਆ ਹੈ। ਮਹਾਰਾਸ਼ਟਰ ਦੇ ਅਕੋਲਾ ਵਿੱਚ ਨਕਲੀ ਲਸਣ ਵੇਚਣ ਦਾ ਮਾਮਲਾ ਸਾਹਮਣੇ ਆਉਣ ਤੋਂ ਬਾਅਦ ਹੜਕੰਪ ਮਚ ਗਿਆ ਹੈ। ਬਾਜ਼ਾਰ ਵਿੱਚ ਵਧੀਆ ਕੀਮਤਾਂ ਤੋਂ ਬਾਅਦ ਹੁਣ ਨਕਲੀ ਲਸਣ ਵੇਚਿਆ ਜਾ ਰਿਹਾ ਹੈ।
ਆਈਆਂ ਖਬਰਾਂ ਮੁਤਾਬਕ ਅਕੋਲਾ ਵਿੱਚ ਸੀਮਿੰਟ ਨਾਲ ਬਣੀ ਨਕਲੀ ਲਸਣ ਮਿਲਾਕੇ ਕੁਝ ਸਬਜ਼ੀ ਵਾਲੇ ਲੋਕ ਵੇਚ ਰਹੇ ਹਨ। ਮੀਡੀਆ ਵਿੱਚ ਆਈਆਂ ਖਬਰਾਂ ਮੁਤਾਬਕ ਲੋਕਾਂ ਦਾ ਕਹਿਣਾ ਹੈ ਕਿ ਅਕੋਲਾ ਵਿੱਚ ਕਈ ਖੇਤਰਾਂ ਵਿੱਚ ਅਜਿਹੇ ਮਾਮਲੇ ਸਾਹਮਣੇ ਆਏ ਹਨ। ਰੇਹੜੀ ਵਾਲੇ, ਲੋਕਾਂ ਨੂੰ ਨਕਲੀ ਲਸਣ ਵੇਚ ਕੇ ਚਲਦੇ ਬਣਦੇ ਹਨ।
ਬਾਜੋਰੀਆ ਨਗਰ ਵਿੱਚ ਰਹਿਣ ਵਾਲੇ ਪੁਲਿਸ ਵਿਭਾਗ ਤੋਂ ਸੇਵਾ ਮੁਕਤ ਸੁਭਾਸ ਪਾਟਿਲ ਦੀ ਪਤਨੀ ਨੇ ਘਰ ਦੇ ਸਾਹਮਣੇ ਆਏ ਰੇਹੜੀ ਵਾਲੇ ਤੋਂ ਲਸਣ ਖ਼ਰੀਦਿਆ। ਘਰ ਆਉਣ ਦੇ ਬਾਅਦ ਜਦੋਂ ਲਸਣ ਛਿੱਲਣ ਲੱਗੀ, ਉਸਦੀ ਕਲੀ ਅਲਗ ਹੀ ਨਹੀਂ ਹੋ ਰਹੀ ਸੀ, ਚਾਕੂ ਨਾਲ ਕੱਟਣ ਉਤੇ ਵੀ ਨਹੀਂ ਟੁੱਟੀ।
ਜਦੋਂ ਧਿਆਨ ਨਾਲ ਦੇਖਿਆ ਤਾਂ ਪਤਾ ਚਲਿਆ ਕਿ ਉਹ ਸੀਮਿੰਟ ਦੀ ਬਣਿਆ ਹੋਇਆ ਹੈ। ਸੀਮਿੰਟ ਨਾਲ ਲਸਣ ਬਣਾ ਕੇ ਉਸ ਉਤੇ ਰੰਗ ਚੜ੍ਹਾਇਆ ਗਿਆ ਸੀ, ਜੋ ਦੇਖਣ ਨੂੰ ਅਸਲੀ ਲਗਦਾ ਸੀ। ਇਸ ਤੋਂ ਬਾਅਦ ਉਸਨੇ ਲਸਣ ਨੂੰ ਚਾਕੂ ਨਾਲ ਕੱਟਿਆ ਤਾਂ ਉਤੇ ਤੋਂ ਪੇਂਟ ਹਟ ਗਿਆ ਅਤੇ ਸੀਮਿੰਟ ਦਾ ਟੁਕੜਾ ਬਾਹਰ ਨਿਕਲਿਆ।
ਸੇਵਾ ਮੁਕਤ ਪੁਲਿਸ ਕਰਮਚਾਰੀ ਨੇ ਦੋਸ਼ ਲਗਾਇਆ ਕਿ ਨਕਲੀ ਲਸਣ ਬਣਾਉਣ ਲਈ ਸੀਮਿੰਟ ਦੀ ਵਰਤੋਂ ਕੀਤੀ ਗਈ ਸੀ। ਇਸ ਨਕਲੀ ਲਸਣ ਉਤੇ ਸਫੇਦ ਰੰਗ ਵੀ ਚੜ੍ਹਾਇਆ ਗਿਆ ਸੀ। ਜਿਸ ਨਾਲ ਲਸਣ ਅਸਲੀ ਵਰਗਾ ਦਿਖਾਈ ਦੇ ਰਿਹਾ ਸੀ।