ਮੁਜ਼ਫਰਪੁਰ, 27 ਅਗਸਤ, ਦੇਸ਼ ਕਲਿੱਕ ਬਿਓਰੋ :
ਬਿਹਾਰ ਦੇ ਮੁਜਫ਼ਰਪੁਰ ਵਿੱਚ ਇਕ ਦਰਦਨਾਇਕ ਘਟਨਾ ਸਾਹਮਣੇ ਆਈ ਹੈ ਜਿੱਥੇ ਇਕ ਔਰਤ ਨੇ ਆਪਣੀ ਹੀ ਧੀ ਦਾ ਗਲ ਵਢਕੇ ਕਤਲ ਕਰ ਦਿੱਤਾ ਅਤੇ ਲਾਸ਼ ਨੂੰ ਸੂਟਕੇਸ ਵਿੱਚ ਪਾ ਕੇ ਝਾੜੀਆਂ ਵਿੱਚ ਸੁੱਟ ਦਿੱਤਾ। ਮੁਜਫਰਪੁਰ ਜ਼ਿਲ੍ਹੇ ਦੇ ਮਿਠਨਪੁਰਾ ਥਾਣਾ ਖੇਤਰ ਵਿੱਚ ਪੈਂਦੇ ਇਲਾਕੇ ਵਿੱਚ ਪਿਛਲੀ 24 ਅਗਸਤ ਨੂੰ ਇਕ ਸੂਟਕੇਸ ਵਿੱਚ ਬੱਚੀ ਦੀ ਲਾਸ਼ ਬਰਾਮਦ ਹੋਈ ਸੀ। ਮ੍ਰਿਤਕ ਬੱਚੀ ਦੀ ਪਹਿਚਾਣ ਮਿਠਨਪੁਰਾ ਥਾਣਾ ਖੇਤਰ ਦੇ ਰਾਮਬਾਗ ਜਾਨਕੀ ਬਲਭ ਸ਼ਾਸਤਰੀ ਮਾਰਗ ਵਾਸੀ ਮਨੋਜ ਕੁਮਾਰ ਦੀ ਤਿੰਨ ਸਾਲਾ ਧੀ ਮਿਸਟੀ ਵਜੋਂ ਹੋਈ।
ਇਹ ਵੀ ਪੜ੍ਹੋ : ਗ੍ਰਾਂਟ ਹੜੱਪਣ ਦੇ ਦੋਸ਼ ਹੇਠ ਵਿਜੀਲੈਂਸ ਬਿਊਰੋ ਵੱਲੋਂ ਪੰਚਾਇਤ ਸਕੱਤਰ, ਸਰਪੰਚ ਤੇ ਇੱਕ ਹੋਰ ਵਿਅਕਤੀ ਖ਼ਿਲਾਫ਼ ਕੇਸ ਦਰਜ
ਫੋਰੇਂਸਿਕ ਟੀਮ ਨੂੰ ਘਰ ਦੀ ਜਾਂਚ ਕਰਦੇ ਸਮੇਂ ਫਰਸ਼ ਉਤੇ, ਸਿੰਕ ਵਿੱਚ ਅਤੇ ਛੱਤ ਉਤੇ ਖੂਨ ਦੇ ਨਿਸ਼ਾਨ ਮਿਲੇ। ਬੱਚੀ ਦੀ ਮਾਂ ਕਾਜਲ ਗਾਇਬ ਸੀ। ਘਟਨਾ ਵਾਲੇ ਦਿਨ ਉਸਨੇ ਪਤੀ ਮਨੋਜ ਨੂੰ ਫੋਨ ਕਰਕੇ ਦੱਸਿਆ ਸੀ ਕਿ ਉਹ ਆਪਣੀ ਮਾਸੀ ਕੋਲ ਜਾ ਰਹੀ ਹੈ। ਲਾਸ਼ ਮਿਲਣ ਤੋਂ ਬਾਅਦ ਪੁਲਿਸ ਵੱਲੋਂ ਜਾਂਚ ਕੀਤੀ ਜਾ ਰਹੀ ਸੀ। ਪੁਲਿਸ ਨੇ ਮ੍ਰਿਤਕ ਬੱਚੀ ਦੇ ਪਿਤਾ ਦੀ ਸ਼ਿਕਾਇਤ ਉਤੇ ਐਫਆਈਆਰ ਦਰਜ ਕਰ ਲਈ।
ਪੁਲਿਸ ਵੱਲੋਂ ਵੱਖ ਵੱਖ ਬਿੰਦੂਆਂ ਉਤੇ ਜਾਂਚ ਕੀਤੀ ਗਈ। ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਬੱਚੀ ਦੀ ਮਾਂ ਨੂੰ ਹਿਰਾਸਤ ਵਿੱਚ ਲੈ ਕੇ ਪੁੱਛਗਿੱਛ ਕੀਤੀ ਗਈ ਤਾਂ ਮਾਮਲੇ ਦਾ ਅਸਲੀ ਸੱਚ ਸਾਹਮਣੇ ਆ ਗਿਆ।
ਪੁੱਛਗਿੱਛ ਦੌਰਾਨ ਕਾਜਲ ਨੇ ਦੱਸਿਆ ਕਿ ਪਿਛਲੇ ਦੋ ਸਾਲ ਤੋਂ ਉਸਦਾ ਕਿਸੇ ਨਾਲ ਪ੍ਰੇਮ ਪ੍ਰਸੰਗ ਚੱਲ ਰਿਹਾ ਸੀ ਅਤੇ ਉਹ ਆਪਣੇ ਪ੍ਰੇਮੀ ਨਾਲ ਰਹਿਣਾ ਚਾਹੁੰਦੀ ਸੀ। ਉਹ ਆਪਣੀ ਬੇਟੀ ਨੂੰ ਨਾਲ ਲੈ ਕੇ ਜਾਣਾ ਚਾਹੁੰਦੀ ਸੀ, ਪ੍ਰੰਤੂ ਪ੍ਰੇਮੀ ਅਜਿਹਾ ਨਹੀਂ ਚਾਹੁੰਦਾ ਸੀ। ਫਿਰ ਉਸਨੇ ਚਾਕੂ ਨਾਲ ਗਲਾ ਵੱਢ ਕੇ ਆਪਣੀ ਧੀ ਦਾ ਕਤਲ ਕਰ ਦਿੱਤਾ ਅਤੇ ਲਾਸ਼ ਨੂੰ ਇਕ ਲਾਲ ਟ੍ਰਾਲੀ ਬੈਗ ਵਿੱਚ ਪਾ ਕੇ ਨੇੜਲੀਆਂ ਝਾੜੀਆਂ ਵਿੱਚ ਸੁੱਟ ਦਿੱਤਾ।
ਆਰੋਪੀ ਮਹਿਲਾ ਨੇ ਦੱਸਿਆ ਕਿ ਉਸਨੇ ਇਕੱਲੀ ਨੇ ਹੀ ਕਤਲ ਕੀਤਾ ਹੈ। ਉਹ ਕ੍ਰਾਈਮ ਪੈਟਰੋਲ ਦੇਖਦੀ ਸੀ ਅਤੇ ਉਸਨੇ ਆਪਣੀ ਧੀ ਦਾ ਕਤਲ ਕਰਨ ਅਤੇ ਲਾਸ਼ ਨੂੰ ਸੂਟਕੇਸ ਵਿੱਚ ਭਰਨ ਦਾ ਵਿਚਾਰ ਟੀਵੀ ਸ਼ੋਅ ਦੇ ਕੁਝ ਐਪੀਸੋਡ ਵਿਚੋਂ ਹੀ ਆਇਆ ਸੀ।