ਪੰਜਾਬ ‘ਚ ਰੇਲ ਗੱਡੀ ਤੇ ਪਥਰਾਅ, ਬੱਚੇ ਦੇ ਸਿਰ ਦੀ ਹੱਡੀ ਟੁੱਟੀ, ਕਈ ਜ਼ਖਮੀ

ਲੁਧਿਆਣਾ, 6 ਸਤੰਬਰ, ਦੇਸ਼ ਕਲਿਕ ਬਿਊਰੋ :

ਲੁਧਿਆਣਾ ਵਿੱਚ RPF (ਰੇਲਵੇ ਸੁਰੱਖਿਆ ਬਲ) ਦੀ ਵੱਡੀ ਲਾਪਰਵਾਹੀ ਸਾਹਮਣੇ ਆਈ ਹੈ। ਰੇਲਵੇ ਟ੍ਰੈਕ ਅਤੇ ਰੇਲ ਗੱਡੀਆਂ 'ਚ ਗਸ਼ਤ ਨਾ ਹੋਣ ਕਾਰਨ ਸ਼ਰਾਰਤੀ ਅਨਸਰ ਖੁੱਲ੍ਹੇਆਮ ਰੇਲਾਂ 'ਤੇ ਪਥਰਾਅ ਕਰ ਰਹੇ ਹਨ। ਬੀਤੀ ਰਾਤ ਲੁਧਿਆਣਾ ਸੈਕਸ਼ਨ ਨੇੜੇ ਬੱਦੋਵਾਲ ਵਿਖੇ ਹਨੂੰਮਾਨ ਗੜ੍ਹ ਤੋਂ ਚੱਲਣ ਵਾਲੀ ਸਤਲੁਜ ਐਕਸਪ੍ਰੈਸ ਗੱਡੀ ਨੰਬਰ 14630 'ਤੇ ਸ਼ਰਾਰਤੀ ਅਨਸਰਾਂ ਨੇ ਪਥਰਾਅ ਕੀਤਾ।
ਟਰੇਨ 'ਚ ਬੈਠੇ ਯਾਤਰੀਆਂ ਨੂੰ ਪੱਥਰ ਵੱਜੇ। ਹਮਲੇ 'ਚ 4 ਸਾਲਾ ਪ੍ਰਿੰਸ ਬੁਰੀ ਤਰ੍ਹਾਂ ਜ਼ਖਮੀ ਹੋ ਗਿਆ। ਪ੍ਰਿੰਸ ਦੇ ਸਿਰ ਦੀ ਹੱਡੀ ਟੁੱਟ ਗਈ ਹੈ। ਕਰੀਬ 2 ਤੋਂ 3 ਹੋਰ ਯਾਤਰੀ ਵੀ ਜ਼ਖਮੀ ਹੋ ਗਏ। ਪਥਰਾਅ ਕਾਰਨ ਟਰੇਨ ਦੇ ਡੱਬੇ 'ਚ ਹੜਕੰਪ ਮਚ ਗਿਆ।
ਲੋਕਾਂ ਨੇ ਚੇਨ ਖਿੱਚ ਕੇ ਟਰੇਨ ਨੂੰ ਰੋਕਿਆ। ਬੱਚੇ ਦਾ ਹਾਲ-ਚਾਲ ਪੁੱਛਣ ਲਈ ਟੀਟੀ ਸਟਾਫ ਟਰੇਨ 'ਚ ਪਹੁੰਚਿਆ ਪਰ ਟਰੇਨ 'ਚ ਫਸਟ ਏਡ ਦੀ ਕੋਈ ਸਹੂਲਤ ਨਹੀਂ ਸੀ। ਸੂਤਰਾਂ ਅਨੁਸਾਰ ਪਤਾ ਲੱਗਾ ਹੈ ਕਿ ਪਥਰਾਅ ਦੌਰਾਨ ਰੇਲ ਗੱਡੀ ਦੇ ਲੋਕੋ ਪਾਇਲਟ ਨੂੰ ਵੀ ਪੱਥਰ ਲੱਗੇ। ਖੂਨ ਨਾਲ ਲੱਥਪੱਥ ਪ੍ਰਿੰਸ ਨੂੰ ਲੁਧਿਆਣਾ ਰੇਲਵੇ ਸਟੇਸ਼ਨ 'ਤੇ ਪਹੁੰਚ ਕੇ ਮੁੱਢਲੀ ਸਹਾਇਤਾ ਦਿੱਤੀ ਗਈ।ਹਾਲਤ ਨਾਜੁਕ ਹੋਣ ਕਾਰਨ ਬੱਚੇ ਨੂੰ ਪੀਜੀਆਈ ਰੈਫਰ ਕੀਤਾ ਗਿਆ।