ਨੈਰੋਬੀ, 21 ਜੁਲਾਈ, ਦੇਸ਼ ਕਲਿੱਕ ਬਿਓਰੋ :
ਕੇਨੀਆ ਦੀ ਇਕ ਦਰਦਨਾਕ ਖਬਰ ਸਾਹਮਣੇ ਆਈ ਹੈ ਜਿੱਥੇ ਇਕ ਵਿਅਕਤੀ ਨੇ ਇਕ-ਇਕ ਕਰਕੇ 42 ਔਰਤਾਂ ਦਾ ਕਤਲ ਕਰਕੇ ਲਾਸ਼ਾਂ ਥਾਣੇ ਦੇ ਨੇੜੇ ਸੁੱਟ ਦਿੱਤੀਆਂ ਹਨ। ਕੇਨੀਆ ਦੀ ਰਾਜਧਾਨੀ ਨੈਰੋਬੀ ਵਿੱਚ ਇਕ ਸਨਕੀ ਸੀਰੀਅਲ ਕਿਲਰ ਵੱਲੋਂ ਜੋ ਕਬੂਲ ਕੀਤਾ ਗਿਆ ਹੈ ਉਹ ਬਹੁਤ ਡਰਾਉਣ ਵਾਲਾ ਹੈ। ਪੁਲਿਸ ਮੁਤਾਬਕ ਕਾਲਿਨਸ ਜੁਮੈਸੀ ਖਾਲੁਸ਼ਾ ਨੂੰ ਲੋਕ ‘ਪਿਸ਼ਾਚ’ ਕਹਿੰਦੇ ਹਨ। ਮੀਡੀਆ ਵਿੱਚ ਆਈਆਂ ਖਬਰਾਂ ਮੁਤਾਬਕ 33 ਸਾਲਾ ਆਰੋਪੀ ਨੇ ਹੁਣ ਤੱਕ ਘੱਟ ਤੋਂ ਘੱਟ 42 ਔਰਤਾਂ ਦਾ ਕਤਲ ਕੀਤਾ ਹੈ, ਜਿਨ੍ਹਾਂ ਵਿੱਚ ਉਸਦੀ ਪਤਨੀ ਵੀ ਸ਼ਾਮਲ ਹੈ। ਉਹ ਕਤਲ ਕਰਨ ਤੋਂ ਬਾਅਦ ਔਰਤ ਦੀ ਲਾਸ਼ ਦੀ ਦੁਰਦਸ਼ਾ ਕਰ ਦਿੰਦਾ ਸੀ ਅਤੇ ਫਿਰ ਉਸ ਨੂੰ ਬੋਰੀ ਵਿੱਚ ਪੈਕ ਦਿੰਦਾ ਸੀ। ਆਰੋਪੀ ਨੈਰੋਬੀ ਵਿੱਚ ਇਕ ਪੁਲਿਸ ਥਾਣੇ ਨੇੜੇ ਸਲਮ ਵਿੱਚ ਜਾ ਕੇ ਇਨ੍ਹਾਂ ਲਾਸ਼ਾਂ ਨੂੰ ਸੁੱਟ ਦਿੰਦਾ ਸੀ। ਤਲਾਸ਼ੀ ਦੌਰਾਨ ਉਸਦੇ ਘਰੋਂ ਬਾਂਕਾ, ਰਬੜ ਦੇ ਦਸਤਾਨੇ, ਸੇਲੋਟੇਪ ਅਤੇ ਲਾਈਲੌਨ ਦੇ ਬੋਰੇ ਮਿਲੇ ਹਨ।
ਨੈਰੋਬੀ ਦੇ ਇਕ ਸਲਮ ਵਿੱਚ ਜਦੋਂ 9 ਕੰਕਾਲ ਮਿਲੇ ਤਾਂ ਮਾਮਲੇ ਦੀ ਜਾਂਚ ਸ਼ੁਰੂ ਹੋਈ। ਇੱਥੇ ਸਥਾਨਕ ਲੋਕ ਕੂੜਾ ਸੁੱਟਦੇ ਸਨ। ਉਸ ਵਿੱਚ ਖਾਲੁਸ਼ਾ ਲਾਸ਼ਾਂ ਨੂੰ ਸੁੱਟ ਜਾਂਦਾ ਸੀ। ਇਸ ਤੋਂ ਬਾਅਦ ਖਾਲੁਸ਼ਾ ਨੇ ਸਵੀਕਾਰ ਕੀਤਾ ਕਿ ਉਹ ਔਰਤਾਂ ਨੂੰ ਲਾਲਚ ਦਿੰਦਾ ਹੈ ਅਤੇ ਫਿਰ ਕਤਲ ਕਰਕੇ ਲਾਸ਼ਾਂ ਸੁੱਟ ਦਿੰਦਾ ਹੈ।
ਖਬਰਾਂ ਮੁਤਾਬਕ ਅਦਾਲਤ ਵਿੱਚ ਦੱਸਿਆ ਗਿਆ ਕਿ ਖਾਲੁਸ਼ਾ ਨੇ ਆਪਣੀ ਜ਼ੁਰਮ ਕਬੂਲ ਕੀਤੇ ਹਨ। ਉਸਨੇ 2022 ਤੋਂ ਹੁਣ ਤੱਕ 42 ਔਰਤਾਂ ਦਾ ਕਤਲ ਕੀਤਾ ਜਿਸ ਵਿੱਚ ਉਸਦੀ ਪਤਨੀ ਵੀ ਸ਼ਾਮਲ ਹੈ। ਖਾਲੁਸ਼ਾ ਦੇ ਘਰੋਂ ਪੁਲਿਸ ਨੂੰ ਕਈ ਮੋਬਾਇਲ ਫੋਨ, ਆਈ ਕਾਰਡ, ਨਾਈਲੌਨ ਦੇ ਬੋਰੇ ਮਿਲੇ। ਖਾਲੁਸ਼ਾ ਦੀ ਸ਼ਿਕਾਰ ਹੋਈਆਂ ਔਰਤਾਂ ਵਿਚੋਂ 26 ਸਾਲ ਦੀ ਜੋਸੇਫੀਨ ਓਵਿਨੀ ਵੀ ਸੀ। ਇਕ ਦਿਨ ਉਨ੍ਹਾਂ ਨੂੰ ਫੋਨ ਆਇਆ ਅਤੇ ਇਸ ਤੋਂ ਬਾਅਦ ਉਹ ਗੁੰਮ ਹੋ ਗਈ ਸੀ। ਉਸਦੀ ਭੈਣ ਪੇਰਿਸ ਕੇਆ ਨੇ ਉਸ ਨੂੰ ਲਭਣਾ ਸ਼ੁਰੂ ਕੀਤਾ ਅਤੇ ਫਿਰ ਪਤਾ ਚਲਿਆ ਕਿ ਕੂੜੇ ਦੇ ਢੇਰ ਉਤੇ ਉਸਦੀ ਲਾਸ਼ ਪਈ ਹੈ।
ਜਾਂਚ ਵਿੱਚ ਪਤਾ ਚਲਿਆ ਕਿ ਜ਼ਿਆਦਾਤਰ ਲਾਸ਼ਾਂ ਦੇ ਧੜ ਮੌਜੂਦ ਸਨ , ਪ੍ਰੰਤੂ ਸਿਰ ਗਾਇਬ ਸਨ। ਕੇਵਲ ਇਕ ਪੂਰੀ ਲਾਸ਼ ਮਿਲੀ ਸੀ। ਕਿਸੇ ਵੀ ਲਾਸ਼ ਉਤੇ ਗੋਲੀਆਂ ਦੇ ਨਿਸ਼ਾਨ ਨਹੀਂ ਸਨ। ਇਕ ਦਾ ਗਲਾ ਦਬਾਕੇ ਕਤਲ ਕੀਤਾ ਗਿਆ। ਜਦੋਂ ਕੇਨੀਆ ਦੀ ਪੁਲਿਸ ਦੀ ਵੀ ਆਲੋਚਨਾ ਹੋ ਰਹੀ ਹੈ। ਲੋਕਾਂ ਦਾ ਕਹਿਣਾ ਹੈ ਕਿ ਐਨੇ ਦਿਨਾਂ ਵਿਚ ਪੁਲਿਸ ਇਕ ਵੀ ਗੁੰਮ ਔਰਤ ਦੀ ਭਾਲ ਨਹੀਂ ਕਰ ਸਕੀ ਅਤੇ ਨਾ ਹੀ ਉਸ ਸੀਰੀਅਲ ਕਿਲਰ ਬਾਰੇ ਪਤਾ ਲਗਾ ਸਕੀ।
ਕੇਨੀਆ ਵਿੱਚ ਅੱਜ-ਕੱਲ੍ਹ ਲਿੰਗ ਆਧਾਰਿਕ ਹਿੰਸਾ ਅਤੇ ਰਾਜਨੀਤਿਕ ਉਥਲ ਪੁਥਲ ਚਲ ਰਹੀ ਹੈ। ਇਸ ਦੌਰਾਨ ਵਿਰੋਧੀ ਪਾਰਟੀਆਂ ਦਾ ਇਹ ਵੀ ਕਹਿਣਾ ਹੈ ਕਿ ਸਰਕਾਰ ਪ੍ਰਮੁੱਖ ਮੁੱਦਿਆਂ ਤੋਂ ਧਿਆਨ ਹਟਾਉਣ ਲਈ ਇਸ ਮਾਮਲੇ ਨੂੰ ਹਵਾ ਦੇ ਰਹੀ ਹੈ।